投資萬邦=買樓收租

在港上市的兩千多間公司中，萬邦投資(158)可說是最簡單得可愛的公司之一，持有投資物業83億元(萬邦行及金利商業大廈)、2.4億元現金、0.28億元非上市公司投資，並無借貸。收入則主要來自1.09億元租金(半年)，全公司職員僅16人，省水省力，真甚少如此精簡人手的上市公司。
公司對股東甚為慷慨，收取淨租金收入近乎盡派股息，小股東亦長情得肯，十分惜售，以致交投甚為疏落，據聞公司每年股東大會後的用餐，是全港上市公司中最為豐富。
現價$192.1、市盈率3.17倍、股息率2.6%、市值48.03億元，買萬邦投資的股票=買樓收租無異。

溫故知新：據2015年蘋果日報報導，萬邦投資在中環翠亨邨舉行一年一度股東會，跟往年一樣，一大班銀髮小股東齊齊去到捧場，問過幾位老股東，佢哋揸咗萬邦幾十年。
徐伯伯話當年自己好欣賞彤叔，幾十年前後生嗰陣，佢喺中環做看更嗰陣，曾經見過彤叔幾面，佢欣賞彤叔做生意叻，份人又夠老實，於是佢就決定將慳慳埋埋啲錢，用嚟買咗幾千股萬邦，佢買嗰陣，萬邦股價都仲係十幾蚊咋。
萬邦股價過去五年嘭嘭聲咁升，上周五收市報139.5元，雖然萬邦交投疏落到不得了，要買賣都唔算容易，但相信徐伯揸住幾千股，見到賬面賺咁多都好開心喇。
而且，呢隻股派息相當好，過去五年都派逾四蚊，淨係過去三年，每年每股派息4.6元，假設徐伯揸住三千股，每年都袋超過萬三蚊股息。難怪徐伯都話，梗係唔放喇，啲息咁好。
*萬邦現已升至192.1元，每年每股派息5元。